काठमाडौं। प्रभु बैंक लिमिटेडको निष्क्रिय कर्जा अनुपात आर्थिक वर्ष २०८३/८४ को पहिलो त्रैमास (असोज मसान्तसम्म) मा १४.८० प्रतिशत पुगेको छ। अघिल्लो आर्थिक वर्षको सोही अवधिमा यो ५.७८ प्रतिशत थियो। खुद निष्क्रिय कर्जा अनुपात १.५९ प्रतिशतबाट ५.०२ प्रतिशत पुगेको छ। कुल कर्जा नोक्सानी व्यवस्था र निष्क्रिय कर्जाको अनुपात ११५.७१ प्रतिशतबाट घटेर ७६.१३ प्रतिशतमा झरेको छ।
अनअडिटेड वित्तीय विवरणअनुसार बैंकले समीक्षा अवधिमा ६०.३७ करोड रुपैयाँ खुद नाफा आर्जन गरेको छ। अघिल्लो वर्षको सोही अवधिमा यो ५५.८५ करोड रुपैयाँ थियो, जसको तुलनामा नाफा ८.१० प्रतिशतले बढेको हो। ब्याज आम्दानी १८.८० प्रतिशतले घटेर ५२४.५२ करोड रुपैयाँ भएको छ। ब्याज खर्च १८.३५ प्रतिशतले घटे पनि खुद ब्याज आम्दानी १९.३६ प्रतिशतले घटेर २३३.४७ करोड रुपैयाँमा सीमित भएको छ। कुल सञ्चालन आम्दानी ११.८८ प्रतिशतले घटेर ३३७.०७ करोड रुपैयाँ भएको छ।
कर्जा तथा अन्य नोक्सानी व्यवस्था ४१.३५ प्रतिशतले घटेर ५८.८७ करोड रुपैयाँ (अघिल्लो वर्ष १००.३८ करोड) मा सीमित भएको छ। यसले खुद सञ्चालन आम्दानीको गिरावट १.४० प्रतिशतमा सीमित गरेको छ। सञ्चालन नाफा १.५० प्रतिशतले घटेर ११५.४५ करोड रुपैयाँ भएको छ। कर खर्च ९.७१ प्रतिशतले घटेर ५५.४३ करोड रुपैयाँ भएको छ। यसले कर अघिको नाफा १.२३ प्रतिशतले घटे पनि खुद नाफा बढेको देखिन्छ।
बैंकको वितरणयोग्य नोक्सानी ६७८.७७ करोड रुपैयाँ छ, जुन अघिल्लो वर्षको सोही अवधिमा ४०.६१ करोड रुपैयाँ नाफामा थियो। आर्थिक वर्षको सुरुमा सञ्चित नोक्सानी ६३१.८६ करोड रुपैयाँ थियो। चालु त्रैमासमा वितरणका लागि उपलब्ध खुद नाफा ४६.९१ करोड रुपैयाँ ऋणात्मक छ (अघिल्लो वर्ष ६३.९० करोड ऋणात्मक)। बैंकले असुल हुन बाँकी ब्याज र गैरबैंकिङ सम्पत्तिसम्बन्धी नियामकीय समायोजनका कारण सञ्चित नाफा घटेको जनाएको छ।
पूँजीकोष अनुपात १३.६० प्रतिशतबाट ११.८३ प्रतिशतमा र प्राथमिक पूँजी (Tier 1) तथा CET 1 अनुपात ९.८६ प्रतिशतबाट ८.१८ प्रतिशतमा झरेको छ।
असोज मसान्तमा निक्षेप ३५०.०३ अर्ब रुपैयाँ (असार मसान्तको तुलनामा ०.५७ प्रतिशतले बढी) र ग्राहक कर्जा २११.३१ अर्ब रुपैयाँ (१.५९ प्रतिशतले कम) रहेको छ। लगानी २६.६० प्रतिशतले घटेर ९५.९६ अर्ब रुपैयाँ भएको छ। कुल सम्पत्ति १.२६ प्रतिशतले बढेर ४१७.२६ अर्ब रुपैयाँ पुगेको छ। वार्षिकीकृत प्रतिशेयर आम्दानी (EPS) १०.२६ रुपैयाँ (अघिल्लो वर्ष ९.४९), प्रतिशेयर नेटवर्थ १४३.६४ रुपैयाँ र P/E अनुपात १८.८० छ।
Published by Prabhu Bank on 2083-7-15
