काठमाडौँ — एटीएम प्रणाली नै ह्याक गरेर काठमाडौंका ९ विभिन्न बैंकका अवैध भिसा कार्डमार्फत सवा करोडभन्दा धेरै रकम चोरीमा संलग्न ५ चिनियाँ नागरिक पक्राउ परेका छन् । प्रहरी परिसर काठमाडौंको विशेष टोलीले शनिबार साँझ उनीहरूलाई पक्राउ गरेको हो ।
चोरीमा संलग्न अन्य तीन चिनियाँ फरार छन् । प्रहरीले पक्राउ परेका चिनियाँको साथबाट १ करोड २६ लाख रुपैयाँ मात्र बरामद गरेको छ ।
शुक्रबार काठमाडौं आएका उनीहरूले शनिबार ५ घण्टामा १५ सय पटक कार्ड प्रयोग गरेको पाइएको छ । चिनियाँहरू नबिल, नेपाल एसबीआई र नेपाल इन्भेस्टमेन्ट बैंकको एटीएम बुथ प्रयोग गरेका छन् । रकम झिक्न प्रभु, एनआईसी एसिया, सिद्धार्थ, जनता, ग्लोबल आईएमई र सनराइज बैंकको एटीएम कार्ड प्रयोग भएको छ ।
