बैंक अफ कोरिया र युनिभर्सिटी अफ कोरियाको संयुक्त अनुसन्धान टोलीले नेपालको वित्तीय समावेशीकरण तथा वित्तीय साक्षरता र यससम्बन्धी नीतिबारे अनुसन्धान गर्ने भएको छ । नेपाल राष्ट्र बैंक र बैंक अफ कोरियाबीच ‘बैंक अफ कोरिया–नलेज पार्टनरशीप प्रोग्राम’ गर्न समझदारी भएको हो ।
यसै आर्थिक वर्षमा सो कार्यक्रम सञ्चालन गर्न दुई बैंकबीच मंगलवार राजधानीमा आयोजित एक समारोहमा समझदारीपत्र (एमओयू) मा हस्ताक्षर गरेको छ । समझदारीपत्रमा राष्ट्र बैंकका तर्फबाट गभर्नर कार्यालयका निर्देशक गोविन्दप्रसाद नागिला र बैंक अफ कोरियाका अन्तरराष्ट्रिय मामिला विभागका डेपुटी डाइरेक्टर जनरल जी योंग जंगले हस्ताक्षर गरेका थिए ।
अनुसन्धानपछि टोलीले अन्तरिम र अन्तिम (विस्तृत) गरी दुई चरणमा नीतिगत सुझावसहितको प्रतिवेदन पेश गर्ने बताइएको छ । सो अध्ययनपछि नेपालको वित्तीय साक्षरता अभियान विस्तार गर्न महत्त्वपूर्ण सुझाव पाइने राष्ट्र बैंकको अपेक्षा छ । यस्तो कार्यक्रमबाट दुई बैंकमा भएका नीतिगत अभ्यासको ज्ञान आदानप्रदानमा मद्दत पुग्ने बताइएको छ ।
