भदौमा पैसा राख्दा कुन बैंकले दिन्छ धेरै ब्याज ? हेर्नुहोस् २० बैंकको नयाँ दर

काठमाडौँ । वाणिज्य बैंकहरूको मुद्दती निक्षेपको ब्याजदर घट्ने क्रम भदौ महिनामा पनि जारी रहेको छ। बैंकहरूले भदौका लागि सार्वजनिक गरेको ब्याजदर विवरणअनुसार २० वाणिज्य बैंकमध्ये ५ बैंकले साउनको तुलनामा ब्याजदर घटाएका छन् भने बाँकी १५ बैंकले पुरानै दरलाई निरन्तरता दिएका छन्। अर्थात कुनै पनि बैंकले यसपटक ब्याजदर बढाएका छैनन्।

भदौमा ब्याजदर घटाउनेमा सिद्धार्थ बैंक र नेपाल बैंक प्रमुख रहेका छन्। सिद्धार्थ बैंकले व्यक्तिगत मुद्दती निक्षेपको ब्याजदर ०.२९ प्रतिशत बिन्दु र संस्थागत मुद्दती निक्षेपको ब्याजदर ०.२० प्रतिशत बिन्दुले घटाएको छ।

नेपाल बैंकले भने व्यक्तिगत मुद्दती निक्षेपको ब्याजदर ०.१० प्रतिशत बिन्दु र संस्थागत मुद्दती निक्षेपको ब्याजदर ०.५० प्रतिशत बिन्दुले घटाएको छ। संस्थागत मुद्दतीतर्फ नेपाल बैंकको कटौती यसपटक सबैभन्दा ठूलो हो।

यसैगरी, सिटिजन्स बैंक इन्टरनेसनलले व्यक्तिगत मुद्दती निक्षेपको ब्याजदर ०.१० प्रतिशत बिन्दुले, कुमारी बैंकले ०.०९ प्रतिशत बिन्दुले र स्ट्यान्डर्ड चार्टर्ड बैंकले ०.०५ प्रतिशत बिन्दुले घटाएका छन्। यी तीनवटै बैंकले संस्थागत मुद्दती निक्षेपको ब्याजदर भने साउनकै स्तरमा कायम राखेका छन्।

यसरी २० वाणिज्य बैंकमध्ये १५ बैंकले भदौमा साउनकै ब्याजदरलाई निरन्तरता दिएका छन् भने कुनै पनि बैंकले ब्याजदर वृद्धि गरेका छैनन्।

ब्याजदर यथावत् राख्ने बैंकहरूमा नबिल बैंक, कृषि विकास बैंक, लक्ष्मी सनराइज बैंक, प्रभु बैंक, नेपाल इन्भेष्टमेन्ट मेगा बैंक, एनएमबि बैंक, सानिमा बैंक, माछापुच्छ्रे बैंक, नेपाल एसबिआई बैंक, एभरेष्ट बैंक, हिमालयन बैंक, एनआईसी एशिया बैंक, राष्ट्रिय वाणिज्य बैंक, प्राइम कमर्सियल बैंक र ग्लोबल आइएमई बैंक रहेका छन्। यी बैंकले भदौका लागि व्यक्तिगत तथा संस्थागत मुद्दती निक्षेपको ब्याजदरमा कुनै परिवर्तन गरेका छैनन्।

व्यक्तिगत मुद्दतीमा कसले कति ब्याज दिँदैछन्?

भदौका लागि व्यक्तिगत मुद्दती निक्षेपमा नबिल बैंक र प्रभु बैंकले सबैभन्दा बढी ४.५५ प्रतिशत ब्याजदर तोकेका छन्। यस्तै, कुमारी बैंक र सिद्धार्थ बैंकले सबैभन्दा कम ३.७६ प्रतिशत ब्याजदर दिने भएका छन्।

यसरी हेर्दा भदौमा पनि वाणिज्य बैंकहरूको मुद्दती निक्षेपको ब्याजदरमा व्यापक वृद्धि देखिएको छैन। अधिकांश बैंकले साउनकै दरलाई निरन्तरता दिएका छन् भने केही बैंकले व्यक्तिगत तथा संस्थागत मुद्दतीतर्फ ब्याजदर घटाएका छन्।

वाणिज्य बैंकहरूको साउन र भदौ २०८३ को अधिकतम मुद्दती निक्षेप ब्याजदर तुलना