उदयपुर — १४ महिनादेखि तलब नपाएपछि उदयपुर सिमेन्ट उद्योगमा कार्यरत श्रमिक तथा कर्मचारी आन्दोलित बनेका छन् । उद्योगमा कार्यरत मजदुर–कर्मचारीले महिनौंदेखि तलब, सञ्चय कोष, नागरिक लगानी कोष, बिमा र अन्य सेवा–सुविधा नपाएको भन्दै आन्दोलन सुरु गरेका हुन् ।
सरकारी स्वामित्वको उद्योगमा लामो समयदेखि सुविधा रोकिँदा दैनिक जीवनयापनमै समस्या भएको र केही कर्मचारीले ज्यानसमेत गुमाउनु परेको भन्दै उनीहरूले समाधानका लागि सरकारले तत्काल पहल गर्न माग गरेका छन् ।
शुक्रबार उद्योग परिसरमा व्यानर र पर्चासहित बिरोधमा उत्रिएका श्रमिकहरुले १४ महिनाको तलब/ज्याला, ४५ महिनासम्म तलबबाट कट्टा गरिएको सञ्चय कोष रकम, ३५ महिनासम्म कट्टा गरिएको नागरिक लगानी कोष, तीन वर्षको बिमा प्रिमियम र सुरक्षा तथा दैनिक ज्यालादारीको रकम पाउन बाँकी रहेको बताएका छन् ।
