काठमाडौँ — कर्मचारी सञ्चय कोष, नागरिक लगानी कोष र सामाजिक सुरक्षा कोषले सामूहिक लगानी कोष, प्राइभेट इक्विटी फन्ड, भेञ्चर क्यापिटल फन्डलगायतमा लगानीको बाटो खुलेको छ । सरकारले केही नेपाल ऐनलाई संशोधन गर्न बनेको अध्यादेशमार्फत उल्लिखित संस्थालाई सामूहिक लगानी कोष, प्राइभेट इक्विटी फन्ड, भेञ्चर क्यापिटल फन्डलगायतमा लगानीको बाटो खुलाएको हो ।
यसका लागि सरकारले अध्यादेशमार्फत कर्मचारी सञ्चय कोष ऐन, नागरिक लगानी कोष ऐन र योगदानमा आधारित सामाजिक सुरक्षा कोष ऐन संशोधन गरेको छ । ‘धितोपत्र बोर्डबाट स्वीकृति प्राप्त सामूहिक लगानी कोष, प्राइभेट इक्विटी फन्ड र भेञ्चर क्यापिटल फन्डका धितोपत्र इकाइमा लगानी गर्ने,’ केही ऐन संशोधन गर्न बनेको अध्यादेशमा उल्लेख छ ।
