काठमाडौँ । सरकारले देशको ऊर्जा क्षेत्रको कायापलट गर्ने उद्देश्यसहित ‘ऊर्जा खपत वृद्धि तथा निर्यात रणनीति, २०८३ (आर्थिक वर्ष २०८२/०८३–२०९२/०९३)’ सार्वजनिक गरेको छ । ऊर्जा जलस्रोत तथा सिँचाइ मन्त्रालयले देशमा उत्पादित बिजुलीको आन्तरिक खपत बढाउँदै बढी भएको विद्युत् क्षेत्रीय बजारमा निर्यात गरी व्यापार घाटा न्यूनीकरण गर्ने र समग्र आर्थिक समृद्धि हासिल गर्ने मूल ध्येयका साथ यो १० वर्षे रणनीतिक मार्गचित्र ल्याइएको जनाएको छ ।
यो १० वर्षे रणनीतिले नेपालको ऊर्जा क्षेत्रलाई केवल उत्पादनमा मात्र सीमित नराखी खपत र व्यापारको बृहत्तर आयाममा जोड्न खोजेको छ । १० वर्षमा १५ हजार मेगावाट निर्यात र १५०० युनिट खपतको लक्ष्यसहित यो रणनीति ल्याइएको हो । यदि तोकिएको समयसीमा भित्र जलाशययुक्त आयोजनाहरू र अन्तरदेशीय प्रसारण लाइन निर्माण सम्पन्न हुन सकेमा नेपाल साँच्चिकै ऊर्जामा आत्मनिर्भर भई छिमेकी देशहरूका लागि उज्यालोको स्रोत र आफ्नै अर्थतन्त्रका लागि समृद्धिको आधार बन्ने निश्चित छ ।
