काठमाडौँ — मेची भन्सार कार्यालयबाट चालु आर्थिक वर्ष २०८२/८३ को माघ मसान्तसम्ममा अलैंची निर्यात ५९ दशमलव ८० प्रतिशतले बढेको छ । कार्यालयका अनुसार उक्त अवधिमा ८ अर्ब ६१ करोड २० लाख ७ हजार बराबरको अलैंची निर्यात भएको हो ।
चालु आवको अहिलेसम्म ४ हजार १५३ दशमलव १५ मेट्रिक टन अलैंची निर्यात भएको मेची भन्सार कार्यालयका सूचना अधिकारी ईश्वरकुमार हुमागाईंले जानकारी दिए । अघिल्लो आव २०८१/८२ को सोही अवधिमा ५ अर्ब ३८ करोड ८० लाख २० हजार बराबरको अलैंची निर्यात भएको उनले बताए ।
