काठमाडौँ । नागढुंगा–सिस्नेखोला सुरुङमार्ग पूर्ण रूपमा सञ्चालनमा आउन अझै तीन महिना लाग्ने आयोजनाले जनाएको छ । हाल आयोजनाको पश्चिम पोर्टल (धादिङतर्फ) मा देखिएको पहिरोको समस्या र सञ्चालनका लागि सेवा प्रदायक छनोट प्रक्रिया चलिरहेको छ । उक्त पहिरो व्यवस्थापनको काम भर्खर सुरु भएको र सम्पन्न हुन दुईदेखि तीन महिना लाग्ने आयोजनाको दाबी छ ।
नागढुंगा सुरुङमार्ग निर्माण आयोजनाका इन्जिनियर सञ्जय पन्थीका अनुसार धादिङतर्फको पोर्टलमा पहिरो नियन्त्रणको काम धमाधम भइरहेको छ । ‘यो काम सकेर सुरुङ सञ्चालन गर्न मिल्ने अवस्था बनाउन करिब दुई–तीन महिना लाग्छ,’ पन्थीले भने ।
