म्याग्दीको अन्नपूर्ण गाउँपालिका-७ दोसल्लेका किसानले यस वर्ष करिब दुई करोड रूपैयाँ मूल्य बराबरको सुन्तलाको व्यापार गरेका छन्।
बयालीस घरधुरीको बसोबास रहेको दोसल्लो गाउँमा गत वर्ष सुन्तलाबाट एक करोड ८० लाख भित्रिएको थियो। यसपालि दाना कम लागे पनि मूल्य बढेको र नयाँ बिरुवामा दाना लागेकाले समग्रमा गत वर्षकै अनुपातमा आम्दानी भएको दोसल्ले व्यवसायिक सुन्तलाजात किसान समूहका अध्यक्ष प्रेम पाइजाले बताए। “गत वर्षको तुलनामा यसपालि बोटमा २५ प्रतिशत कम दाना लागेको छ,” उनले भने “बढी मूल्यमा सुन्तला बिक्री भएकाले पाेहाेरकै हाराहारीमा आम्दानी भएको छ।” बढी मूल्य पार्न माघ महिना लागेपछि सुन्तला टिपेर बजार पठाउन थालेका थिए।
