सरकारले बाली तथा पशुपन्छी बिमामार्फत किसानलाई १२ वर्षमा १० अर्ब ८७ करोड रुपैयाँ बढी अनुदान रकम वितरण गरेको छ। सरकारले २०७०/७१ देखि २०८१/८२ सम्ममा बाली तथा पशुपन्छी बिमामार्फत किसानलाई उक्त रकम अनुदानमार्फत वितरण गरेको हो। सरकारले २०७०/७१ सालदेखि किसानलाई कृषि बिमा वितरण गर्दै आइरहेको जनाएको छ।
कृषि तथा पशुपन्छी विकास मन्त्रालयका सूचना अधिकारी महानन्द जोशीका अनुसार १२ वर्षमा किसानलाई बिमा अनुदानमार्फत १० अर्ब ८७ करोड ९७ लाख ८८ हजार सात सय २८ रुपैयाँ वितरण गरिएको छ। यस अवधिमा बिमा दाबी गर्ने एक लाख ६९ हजार छ सय ७८ जना किसान रहेको सूचना अधिकारी जोशी बताउँछन्।
