पोखरा । मनाङस्थित थोंचेमा दुधखोलामाथि पुल बनाउन १० वर्षअघि साबिकको जिल्ला विकास समितिले ठेक्का लगायो । नासों गाउँपालिकामा पर्ने थोंचेबाट तिल्चे हुँदै उत्तरी छिमेकी देश चीन जोड्ने सडकमा पर्ने यो पुलको २०७३ असारमा ठेक्का लागेको थियो ।
२०७४ साउनमा निर्माण सक्नुपर्ने सम्झौता गरिएकोमा हालसम्म आधामात्र काम सकिएको छ । पुल निर्माणको ठेक्का क्याराभान कम्पनीले पाए पनि मृत सञ्जीवनी र खड्का कृष्ण निर्माण कम्पनीले जेभीमा काम गर्ने सम्झौता भएको थियो । पुल बनाउन पटक–पटक म्याद थप भए पनि निर्माण सम्पन्न हुन सकेको छैन ।
