काठमाडौं । नेपालका बैंक तथा वित्तीय संस्थामा खराब कर्जा लगातार बढ्दै गएको छ । बैंकले निश्चित समयका लागि भनेर कुनै ऋणीलाई दिइएको कर्जा समयमै उठाउन सकेन भने त्यस्तो कर्जालाई एनपीएल (नन पर्फमिङ लोन ) अर्थात् खराब कर्जा भनिन्छ ।
पछिल्लो तथ्यांकअनुसार आर्थिक वर्ष २०८१–८२ को अन्त्यसम्म कुल ५५ खर्ब ८१ अर्ब २० करोड रुपैयाँ कर्जा प्रवाहमध्ये २ खर्ब ५७ अर्ब ८५ करोड रुपैयाँ निष्क्रिय अवस्थामा पुगेको छ । यो कुल कर्जाको ४ दशमलव ६२ प्रतिशत हो ।
अघिल्लो आव २०८०–८१ मा औसत ३ दशमलव ८६ प्रतिशत दरले १ खर्ब ९९ अर्ब २४ करोड रुपैयाँ निष्क्रिय कर्जा रहेकामा यस वर्ष थप ५८ अर्ब ६० करोड रुपैयाँले बढेको छ । यसले बैंकिङ क्षेत्रको जोखिम व्यवस्थापन क्षमतामाथि गम्भीर प्रश्न खडा गरेको छ ।
