ट्रायल पास गर्नेहरुलाई समयमा सवारी चालक अनुमति पत्र (लाइसन्स) दिन नसकेको सरकारले असोज १ गते देखि इम्बोस्ड नम्बर अनिवार्य गर्ने निर्णय गरेको छ । तर, पर्याप्त तयारी बिना नै गरिएको यो निर्णयले सरकार नै अप्ठ्यारोमा पर्ने अवस्था देखिएको छ । अहिले यो इम्बोस्ड नम्बर प्लेटको विषयमा चौथर्फी विरोध भइरहेको हो ।
सामान्यतया सवारीसाधनमा यो परम्परागत प्लेटभन्दा केही फरक देखिने नम्बर प्लेट हो । यसको स्वरुप, संरचना र रचना सबै पहिलेभन्दा फरक रहेको छ । इम्बोस्ड नम्बर प्लेट खासगरी क्यमेरा, जीपीएस ट्राकरजस्ता अत्याधुनिक उपकरणबाट सम्बन्धित सवारी पहिचानका लागि सरकारले सवारी नम्बरप्लेटमा यसलाई लागू गर्न खोजेको जनाएको छ । यो नम्बरप्लेट आलुमिनमले बनेको हुन्छ भने प्लेटमा रहेका नम्बरहरु पहिलेजस्तो छापिएका नभई कुँदिएका हुन्छन् । तर विडम्बना नेपाल सरकारसँग यो प्लेट पढ्ने अहिलेसम्म मेसिन नै छैन ।
