काठमाडौं । घरजग्गा क्षेत्र विगत केही वर्षदेखि सुस्त छ । मूल्य घटेको छ भने किनबेचको क्रम समेत सुस्त छ । घरजग्गा कारोबारमा संलग्न व्यवसायीको तर्क अनुसार यो अवधिमा घरजग्गाको मूल्य ३० प्रतिशत हाराहारीमा घटिसकेको छ । मूल्यांकनकर्ताले त यस्तो गिरावट ३० देखि ५० प्रतिशतसम्म रहेको बताउँदै आएका छन् ।
तर, सरकारले भने यो क्षेत्रको गिरावटलाई स्वीकार गरेको छैन । घरजग्गा कारोबारका लागि गर्ने सरकारी मूल्यांकनमा मूल्य घट्नुको सट्टा झनै बढाएको पाइएको छ । घरजग्गा किनबेचका लागि थैली कायम गर्ने प्रयोजनको मूल्यमा वृद्धि गरिएको बताइएको छ । सम्पत्ति कर प्रयोजनको लागि कायम रहेको मूल्य भने यो वर्ष सामान्यतया स्थिर देखिन्छ ।
