काठमाडौँ । दुई दशकदेखि सफल हुन नसकेको सरकारको पेट्रोलमा इथानोल मिसाउने योजना चालु वर्षभित्रै कार्यान्वयनमा आउने भएको छ । पेट्रोलमा इथानोल मिश्रण गर्ने कार्यविधिको ड्राफ्ट रायका लागि अर्थ मन्त्रालय र कानुन मन्त्रालयमा पठाइएको छ ।
चालु वर्षमै कार्यान्वयनमा ल्याउने गरी प्रक्रिया अघि बढाइएको उद्योग वाणिज्य तथा आपूर्ति मन्त्री दामोदर भण्डारीले रातोपाटीलाई जानकारी दिएका छन् ।
‘पेट्रोलमा इथानोल मिश्रण गर्ने कार्यविधि तयार भइसकेको छ । रायका लागि यसको ड्राफ्ट कानुन मन्त्रालय र अर्थ मन्त्रालयमा पठाएका छौँ ,’ मन्त्री भण्डारीले भने, ‘दुवै मन्त्रालयबाट सहमति भएर आउने क्रममा छ ।’ आउने बित्तिकै कार्यविधि पास गर्छौँ र मन्त्रिपरिषद्बाट त्यसको मूल्य निर्धारणका लागि निर्णय गर्छौँ । चालु वर्षभित्रै यो कार्यविधि कार्यान्वयनमा आउँछ ।’
