काठमाडौं । चालू आर्थिक वर्षको १० महिनाको अन्तरालमा सरकार २ खर्ब रूपैयाँभन्दा बढी बजेट घाटा व्यहोर्न बाध्य भएको छ । बजेट घाटा पूर्ति गर्नकै लागि र कर्जाको साँवा एवं व्याज तिर्नका लागि पनि कर्जा नै लिनुपर्ने अवस्थामा सरकार रहेको छ । १० महिनामा कुल ९ खर्ब २७ अर्ब ५५ करोड १० लाख रूपैयाँ राजस्व संकलन गरेको सरकारले हालसम्ममा ११ खर्ब ६४ अर्ब ४ करोड ४ लाख रूपैयाँ खर्च गरिसकेको छ ।
सरकारको आम्दानीभन्दा खर्च २ खर्ब ३७ अर्ब रूपैयाँले बढी भएको छ । सरकारले यसबीच प्राप्त अनुदान कटाउने हो भने सरकारको आम्दानी र खर्चअन्तर २ खर्ब १० अर्ब रूपैयाँमात्र हुनआउँछ । सरकारको आम्दानी र खर्चमा सवा २ खर्बभन्दा बढी अन्तर हुनुमा राजस्वको लक्ष्य नभेटिनु र सरकारले बाह्य अनुदान एवं कर्जा प्राप्त गर्न नसक्नु मुख्य कारणका रूपमा रहेको छ ।
