काठमाडौँ — रसुवापछि चीनसँगको मुख्य व्यापारिक तातोपानी नाकामा व्यापारका लागि पूर्वाधार तगारो बनेको छ । वैदेशिक व्यापारको प्रबल सम्भावना रहे पनि पर्याप्त भौतिक पूर्वाधार तथा प्रक्रियागत समस्या रहेको सरकारी प्रतिवेदनले औंल्याएको छ । द्विपक्षीय व्यापार प्रवाहलाई सहज बनाउने प्रयास भए पनि समस्या कायमै रहेको उद्योग वाणिज्य तथा आपूर्ति मन्त्रालयले तयार पारेको प्रतिवेदनमा उल्लेख छ ।
मन्त्रालयअन्तर्गत द्विपक्षीय व्यापार तथा पारवहन शाखाका उपसचिव सीता निरौला फुयाल, उपसचिव रमिला भण्डारी, शाखा अधिकृत सन्तोषकुमार श्रेष्ठ, नायव सुब्बा दामोदर तिमिल्सिनाले तयार पारेको प्रतिवेदनमा भौतिक पूर्वाधार व्यापारका लागि तगारो रहेको उल्लेख छ । मन्त्रालयको टोली फागुन ५ देखि ११ सम्म तातोपानी नाका पुगेको थियो । तातोपानी नाकाको भन्सार, गोदाम, क्वारेन्टिन तथा यातायात व्यवस्थापनको अध्ययनमा केन्द्रित रहेर बनाएको प्रतिवेदनमा व्यापार विस्तारका लागि भौतिक पूर्वाधारको प्रक्रियागत समस्या रहेको उल्लेख छ ।
