काठमाडौँ — बाढीले क्षतिग्रस्त बीपी राजमार्गको अध्ययन अन्तिम चरणमा पुगेको छ । बढीमा डेढ साताभित्र अध्ययन प्रतिवेदन आउने सडक विभागले जनाएको छ । तत्काल निर्माण थाल्न भने बजेटको समस्या भएको छ ।
बजेटका लागि गृह मन्त्रालयअन्तर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरणको विपद् व्यवस्थापन कोषमा रहेको बजेट माग गर्नेबारे छलफल भइरहेको सडक विभागका महानिर्देशक रामहरि पोखरेलले बताए । ‘अर्थ मन्त्रालयसँगको परामर्शपछि प्राधिकरणसँग माग गर्ने छलफल भइरहेको छ,’ उनले भने, ‘निर्णय भइसकेको छैन ।’ प्राधिकरणले योजना लिएर आउन भनेको र सबैको योजना संकलन गरेर बजेटबारे निर्णय हुने पोखरेलको भनाइ छ ।
