काठमाडौं । सहकारीमा बचत गरेका सर्वसाधरणको रकम ठगी गरेको आरोपमा गोर्खा मिडिया नेटवर्कका तत्कालीन निर्देशक तथा रास्वपाका सभापति रवि लामिछानेविरुद्ध प्रहरीले तीनवटा कसुरमा अनुसन्धान गर्ने तयारी गरेको छ । शुक्रबार साँझ काठमाडौंबाट पक्राउ परेका लामिछानेलाई अनुसन्धानका लागि कास्की प्रहरीले म्याद थपका लागि आज (आइतबार) अदालतमा पेस गर्दै छ ।
सहकारी रकम ठगी प्रकरण
प्रहरीले सहकारी ठगी, किर्ते र संगठित अपराधमा अनुसन्धानका लागि अदालतबाट म्याद थप गरेर पुनः अनुसन्धान गर्ने तयारी गरेको छ । पोखराको सूर्यदर्शन सहकारीका १८ हजार ७ सय ५० जना सर्वसाधारणले बचत गरेर राखेको रकम हिनामिना भएपछि जिल्ला अदालतल कास्कीले १४ जनाविरुद्ध पक्राउ पुर्जीको अनुमति दिएको थियो । जसमध्ये गोर्खा मिडियाका तत्कालीन प्रबन्ध निर्देशक लामिछाने पनि एक हुन् ।
