_181649.jpeg)
पछिल्लो ११ कारोबार दिनमा सय अंकभन्दा तल झरेको नेपालको शेयर बजारले लगानीकर्तालाई निकै नै निराश बनाएको छ । ‘ब्याजदर घट्यो, अब बजार बढ्छ’ भन्ने रटान र केही हदसम्मको विश्वासले समेत काम नगरेपछि लगानीकर्ता अब ‘राजनीतिक फेरबदल’ले कतै त्राण देला कि भन्ने एक मात्र आशाको सहारामा छन् ।
फागुन ३ गते २०६२.०३ बिन्दुमा रहेको नेप्से २० गते १९६०.३० बिन्दुमा झरिसकेको छ । जबकि घट्दो ब्याजदरका कारण यो बेला कम्तीमा पनि नेप्से परिसूचक २२०० को हाराहारीमा पुग्ने अपेक्षा थियो ।
नेपालको पुँजी बजारले लय समात्ने लामो समयदेखिको आशामा तुसारापात भएपछि ठूला लगानीकर्ता अब के गर्ने भन्ने आन्यौलको स्थितिमा छन् । सेयर बजारमा भएको लगानी घाटा नै सहेर भए पनि निकाल्ने कि भन्ने मनस्थितिमा केही पुगेका भेटिन्छन् त कतिपय सत्ता समीकरणमा फेरबदल हुने र सुखद दिन आउने प्रतीक्षामा बसेका छन् ।
