काठमाडौँ । खनिज इन्धनको खपतमा सामान्य वृद्धि आउन थालेसँगै भन्सार राजश्व बढ्न थालेको छ । भन्सार विभागको ७ महिनाको तथ्यांकअनुसार पेट्रोलियम पदार्थको आयात बढेको छ । आन्तरिक खपत बढेसँगै पेट्रोलियम पदार्थको आयातमा समेत वृद्धि देखिन थालेको हो । यससँगै, विभागले सङ्कलन गर्ने भन्सार राजश्वमा समेत उल्लेख्य वृद्धि देखिएको हो ।
चालु आर्थिक वर्ष २०८०-८१ को ७ महिनाको अवधिमा २ खर्ब ३६ अर्ब ३८ करोड २५ लाख रुपैयाँ भन्सार राजश्व उठेको छ । साउनदेखि माघ महिनासम्मको अवधिमा विभागले उक्त मूल्य बराबरको भन्सार राजश्व सङ्कलन गरेको हो । यस अवधिमा नेपालले विदेशबाट ८ खर्ब ९७ अर्ब ४३ करोड रुपैयाँभन्दा बढीको वस्तु आयात गरेको छ ।
