काठमाडौं : नेप्से सूचक बुधबार १२.१० विन्दुले घटेर २१६३.०६ अंकमा अडिएको छ । करिब ९ अर्ब ७७ करोडको कारोबार भएको छ । यो कारोबार रकम भने २९ महिना यताकै सबैभन्दा धेरै हो । यसअघि २०७८ भदौ २० गते ११ अर्ब १४ करोड रुपैयाँको कारोबार भएको थियो । यस्तै, सोही वर्ष भदौ २१ गते ९ अर्ब ७४ करोड रुपैयाँको सेयर कारोबार भएको थियो । यसआधारमा बुधबार २९ महिनायताकै धेरै कारोबार रकमको रेकर्ड बनेको छ । ४ कम्पनीको भाउ सकारात्मक सर्किट लेबलमा पुगेको छ । १३ मध्ये ४ समूहमात्र वृद्धि भएको छ ।
सेयर बजार सूचक नेप्से बुधबार इन्ट्रा डे कारोबारमा २२ सय विन्दुमाथि उक्लियो । सूचक २२ सय १५ विन्दु आसपाससम्म पुगेपछि पुनः बिक्रेताहरु पनि हावी भए, फलस्वरुपः नेप्से पुनः २२ सय विन्दुमुनि आयो । २२ सय आसपासका विन्दुहरुलाई निकै महत्वपूर्ण मानिएको छ । यो तहमा पुगेपछि विगतमा पनि बजार फर्किएको थियो ।
