पोखरा । पोखरा–१३ काहुँखोलाकी ४० वर्षीया लक्ष्मी महर्जनले २ वर्षअघि सूर्यदर्शन बचत तथा ऋण सहकारी संस्थामा १० लाख रुपैयाँ जम्मा गरिन् । मुद्दती खातामा राखेको सो रकमको राम्रै ब्याज आयो । पहिला १४ प्रतिशत ब्याजदरमा बचत गरेकामा गत वर्ष बढाएर झन् १७ प्रतिशत दिने आश्वासनपछि सो रकम उनले निकालिनन् ।
भविष्यको गर्जो टर्ला भनी आशामा सावाँ र ब्याज गरी सबै सूर्यदर्शनमै राखिन् । तर, गत वर्षको साउनदेखि सहकारीले बचत फिर्ता नगरी सञ्चालक नै भागेको थाहा पाएपछि उनी छाँगाबाट खसेझैं भइन् । ब्याज त के सावाँ पनि नआउने भएपछि अहिले उनी निकै चिन्तित छन् ।
