काठमाडौं– एक वर्षअघि नेपाली कांग्रेस, नेकपा माओवादी केन्द्रसहितको गठबन्धन सरकारको पहिलो मन्त्रिपरिषद् बैठक (पुस ११ मा) ले अर्थतन्त्र सुधारका लागि विभिन्न नीतिगत र संस्थागत सुधारका काम अघि बढाउने निर्णय गरेको थियो । यो निर्णयको एक वर्ष पूरा भएको छ । यसबीच सरकारले देखिने गरी कुनै पनि सुधारका काम गरेन, फलस्वरुप अर्थतन्त्र निरन्तर सुस्त हुँदै आएको छ ।
गठबन्धन सरकारको नेतृत्व गरेका प्रधानमन्त्री पुष्पकमल दाहालले यस पटकको कार्यकालमा देखिने गरी काम गर्ने बताएका थिए । दाहाल सरकारले सुरुमा केही भ्रष्टाचारका फाइल खोलेर काम गर्ने आशा देखाएको थियो । तर, एक वर्षका बीचमा भ्रष्टाचार रोक्ने भन्दा झनै बढ्दै गएको छ । दाहाल सरकारको एक वर्षे कार्यकाल सुशासन, सेवा प्रवाह, सुरक्षा र आर्थिक विकासका सवालमा विगतमा जस्तै खेर गएको छ ।
