काठमाडौं । मधेश प्रदेश सरकारले उखु किसानलाई प्रतिक्विन्टल १० रुपैयाँ अनुदान दिने भएको छ । बिहीबार प्रदेशका मुख्यमन्त्री सरोजकुमार यादवले किसानलाई प्रदेश सरकारबाट उखुमा प्रतिक्विन्टल १० रुपैयाँ अनुदानको व्यवस्था गर्ने सहमति गरेका हुन् ।
बुधबार बसेको केन्द्रीय सरकारको मन्त्रिपरिषद्को वैठकले उखुको न्यूनतम खरिद मूल्य प्रतिक्विन्टल ६३५ रुपैयाँ तोकेको थियो । जसमध्ये ५६५ रुपैयाँ उखु मिलले दिनुपर्ने र ७० रुपैयाँ सरकारले अनुदान दिने निर्णय गरेको थियो ।
सरकारले निर्धारण गरेको उक्त मूल्य किसानको हितमा नभएको भन्दै उखुको मूल्य वृद्धिसहितका माग राखेर किसान शेख इस्तियार सर्लाहीको हरिवनस्थित इन्दु शंकर चिनी उद्योगको मूलगेटमा आमरण अनशनमा बसेका थिए । उनको अनशन तोड्ने क्रममा मुख्यमन्त्री यादवले किसानलाई प्रदेश सरकारबाट उखुमा प्रतिक्विन्टल १० रुपैयाँ अनुदानको व्यवस्था गर्ने सहमति गरेका हुन् ।
