सरकारी स्वामित्वको राष्ट्रिय बीमा संस्थान अबको केही दिनमा पब्लिक लिमिटेड कम्पनीमा रुपान्तरण हुने भएको छ । बीमा ऐन २०७९ मा भएको प्रावधान बमोजिम संस्थान आगामी कात्तिक २३ गतेभित्र पब्लिक कम्पनीमा रुपान्तरण हुनुपर्ने बाध्यात्मक अवस्था छ ।
बीमा ऐन २०७९ मा गरिएको व्यवस्था बमोजिम कम्पनीले विशेष साधारणसभाबाट सो सम्बन्धि प्रस्ताव पारित गर्दै छ । संस्थानले सोहि प्रस्ताव पारित गर्न भदौ १५ मा विशेष साधारणसभा बोलाएको थियो। सो दिन सभा विविध कारणवश बस्न नसकेको भन्दै संस्थानले भदौ २९ गते फेरि विशेष साधारणसभा बोलाएको छ ।
गत असोज २३ गते जारी भएको बीमा ऐन, २०७९ को दफा १७२ को उपदफा ३ क बमोजिम संस्थान कात्तिकको २३ गतेसम्म कम्पनीमा रुपान्तरण हुनुपर्ने छ । साथै हाल २० करोड मात्रै चुक्ता पूँजी रहेको यस संस्थानले नियामक निकाय बीमा प्राधीकरणले तोके बमोजिम चुक्तापूँजी पनि ५ अर्ब पुर्याउनु पर्नेछ ।
