काठमाडौं : भारतीय सेयर बजारमा बिहीबार गिरावट आएको छ । भारतको केन्द्रीय बैंकले लागातर तेस्रो पटक ब्याजदर स्थिर राख्ने निर्णयपछि सेयर बजार प्रभावित भएको हो । रिजर्भ बैंक अफ इन्डिया (आरबीआई) को मौद्रिक नीति कमिटिको बिहीबार सम्पन्न बैठकले लगातार तेस्रो पटक रिपो रेट ६.५% मा स्थिर राख्ने निर्णय गरेको हो ।
यसको असर सेयर बजारमा देखिएको छ । बिहीबार बीएसई सेन्सेक्स सूचक ३०७ अंकले घटेर ६५,६८८ विन्दुमा बन्द भएको छ भने निफ्टी ५० सूचक पनि ८९ अंकले घटेर १९,५४३ विन्दुमा बन्द भएको छ । आरबीआईको बिहीबारको बैठकले मुद्रास्फीतिको दबाब बढ्न सक्ने भन्दै आगामी महिनामा ब्याजदर बढ्न सक्ने संकेत गरेपछि सेयर बजारले नकारात्मक प्रतिक्रिया दिएको हो ।
