काठमाडौं : आर्थिक अवस्था निकै कमजोर रहेको पाकिस्तान र श्रीलंकाको सेयर बजार भने तीब्र गतिमा अगाडि बढेको छ । यी दुई देशको विदेशी मुद्रा सञ्चितिमा आएको कमिका कारण जनजीवन अझै पनि निकै प्रभावित रहेको छ । तर यस्तो अवस्थामा पनि सेयर बजार भने बढेको देखिन्छ । यद्धपि, पछिल्लो समय दुवै देशको आर्थिक अवस्थामा केही सुधार हुँदै गएको छ ।
पाकिस्तान स्टक एक्सचेन्जका अनुसार त्यहाँको मुख्य ‘केएसई १००’ इन्डेक्स यो समाचार तयार पार्दै गर्दा ४८ हजार ४५८ विन्दुमा पुगेको छ । यो २०१७ यताकै उच्च विन्दु हो । सन् २०१७ जुलाईमा सूचक करिब ४८ हजार विन्दुमा थियो । पाकिस्तानलाई अन्तर्राष्ट्रिय मुद्रा कोष (आइएमएफ) ले ऋण दिने भएपछि त्यहाँको सेयर बजारमा ठूलो वृद्धि देखिएको हो ।
