विश्वभर महामारीको रुपमा फैलिएको कोरोना भाइरस (कोभिड–१९) को तस्रो लहरले अन्य क्षेत्र जस्तै लघुवित्त क्षेत्रमा पनि प्रभाव पार्न थालेको छ । अहिले दैनिक रुपमा लघुवित्तका कर्मचारी, सदस्यहरु कोरोना संक्रमित हुन थालेका छन् । कोभिडले लघुवित्त क्षेत्रमा पनि थुप्रै समस्या र चुनौतिहरुको सामना गर्नपर्ने अवस्था आएको छ ।
यसैबीच हामीले लघुवित्त क्षेत्रमा कोरोनाको प्रभाव, लघुवित्त मर्जर लगायतको विषयमा केन्द्रीत रहेर लघुवित्त बैंकर्स संघका अध्यक्ष प्रकाशराज शर्मासँग कुराकानी गरेका छौं । प्रस्तुत छ अध्यक्ष शर्मासँग बैंकिङ खबरले गरेको कुराकानीको सम्पादित अंश ।
कोरोनाको तेस्रो लहरले लघुवित्त क्षेत्रमा कस्तो असर पर्न थालेको छ ?
अब यसको पुरा असर देखिन त बाँकी नै छ । पहिलो र दोस्रो लहरको त सामान्य जस्तै प्रभाव थियो । अब तेस्रो लहरको असर चाहिँ अरुको तुलनामा बढी नै हुने संकेत देखिन्छ । कर्मचारीमा संक्रमण हुने क्रम देखिएको थियो । अब अंकमै यति प्रभाव परेको छ भन्न सकिने अवस्था अहिले नै छैन । केही समयपछि यसको यकिन तथ्यांक पनि आउँला ।
