विश्व मोबाइल प्रविधिको पछिल्लो पुस्ता (फाइभ-जी) मा फड्को मारिरहँदा नेपालमा भने फोर-जी नै देशव्यापी रूपमा विस्तार हुन सकेको छैन।
नेपाल टेलिकमका अनुसार हाल ७५३ मध्ये ६९७ स्थानीय तहमा फोर-जी इन्टरनेट विस्तार भएको छ। यो आर्थिक वर्षमा थप ३७ स्थानीय तहमा विस्तार गर्ने लक्ष्य रहेको टेलिकमका प्रवक्ता राजेश जोशीले बताए।
'यो वर्ष पनि केही स्थानीय तहमा काम अगाडि बढ्न सक्दैन। बाँकी अतिविकट छन्,' उनले सेतोपाटीसँग भने।
प्रतिशतमा हेर्ने हो भने हालसम्म ९२ प्रतिशत फोर-जी विस्तार भइसकेको देखिन्छ। यो वर्षभित्र ९७ प्रतिशत विस्तार गर्ने लक्ष्य टेलिकमको हो।
