नेपाल पुनर्बीमा कम्पनीले पनि अझै बीमा समितिले जारी गरेको लगानी निर्देशिका २०७५ पालना गरेकाे छैन । जीवन तथा निर्जीवन बीमा कम्पनीहरुले जस्तै नेपाल पुनर्बीमा कम्पनीले पनि अझै ठुलो रकम बैंक तथा वित्तीय संस्थाको मुद्धती निक्षेपमा मात्रै लगानी गर्दै आइरहेको छ ।
चालु आर्थिक वर्षको तेस्रो त्रैमाससम्ममा कम्पनीले १६ अर्ब ४८ करोड ९२ लाख रुपैयाँ लगानी गरेको छ । बीमा समितिले जारी गरेको लगानी निर्देशिका अनुसार तोकिएको ६ वटा क्षेत्रमा कम्पनीले सो बराबरको रकम लगानी गरेको हो ।
कम्पनीले १२ अर्ब ४८ करोड रुपैयाँ वाणिज्य बैंकहरुको मुद्धती निक्षेपमा मात्रै लगानी गरेको छ । यो कुल लगानी मध्ये ७६ प्रतिशत हुन आउछ । बीमा समितिले जारी गरेको लगानी निर्देशिका अनुसार क वर्गको बैंकको मुद्दती निक्षेप र नेपालको पूर्वाधार बैंकको मुद्दती निक्षेपमा गरी न्यूनतम ४० प्रतिशत लगानी गर्नुपर्ने व्यवस्था छ ।
यस्तै बैंक तथा वित्तीय संस्थाको अग्राधिकार शेयर र ऋणपत्रमा ८ प्रतिशत अर्थात १ अर्ब ३५ करोड रुपैयाँ लगानी गरेको छ ।
