समय बदलियो, अवसरको प्रचुरताका कारण मानिस व्यस्त बन्दै गयो । अब उसलाई चेक लिएर बैंकसम्म पुग्न वा चेकमा लिखित आदेश दिएर भुक्तानी गर्न झन्झट लाग्न थाल्यो । सञ्चार जगत्ले छोटो समयमा मारेको क्रान्तिकारी छलाङका कारण हात–हातमा स्मार्ट फोन पुगिसकेको छ । इन्टरनेटको विकासले समग्र विश्वलाई साँघुरो बनाइसकेको छ । व्यक्ति अनेकौँ सामाजिक सञ्जालमा आबद्ध छ । देश–विदेशका खबर तथा नवीनतम आविष्कारबारे व्यक्ति जानकार छ । तर, अझै कुनै भुक्तानी गर्नुपर्दा चेक बोकेर बैंक धाउनुपर्छ । हिजो जीवनलाई सरल बनाउने चेक अब उसलाई झन्झटको भारी लाग्न थाल्यो । उपभोक्ताको यही मनोविज्ञानलाई बुझेर वित्तीयसंस्थाहरूले नयाँ प्रविधि भित्र्याउन थाले । डेभिड तथा क्रेडिट कार्डको विकास भयो । बैंकले आफ्ना ग्राहकलाई ‘एटिएम’ सुविधा प्रदान गर्न थाले । अब कार्डको सुविधा लिने ग्राहक आफ्नो खाताबाट पैसा निकाल्न चेक लिएर बैंक धाउनुपर्ने झन्झटबाट मुक्त भयो । पैसाको कारोबार बढी हुने चिकित्सालय, शिक्षालय, सपिङ मल, पार्कलगायतमा एटिएम मेसिन राख्न बैंकहरूबीच होडबाजी नै चल्यो । यसले बैंक र ग्राहक दुवैलाई सहजता दियो । यसैबीच अन्तरबैंकिङ नेटवर्कको विकास भयो । अब एउटा बैंकको एटिएम प्रयोग गरी जुनसुकै बैंकको एटिएमबाट पैसा निकाल्न सकिने भयो । एउटा बैंकको चेक अर्को बैंकमा जम्मा गर्न सकिने सुविधा यसअघि नै विकसित भइसकेको थियो ।
