अमेरिकाको ऊर्जा मन्त्रालयमा साइबर हमला भएको छ । ऊर्जा मन्त्रालयले साइबर हमलाको पुष्टि गर्दै उक्त हमला आमेरिकी सरकारका कुनै पनि मन्त्रालयमाथि अहिलेसम्म भएका साइबर आक्रमणमध्ये सबैभन्दा ठूलो साइबर हमलाको घटना भएको पनि पुष्टि गरेको छ ।
अमेरिकाको ऊर्जा मन्त्रालयले मुलुकका परमाणु हतियारको रेखदेख गर्ने गर्दछ । तथापि पछिल्लो साइबर आक्रमणबाट परमाणु हतियार भण्डारमा कुनै पनि असर नपरेको अमेरिकी सरकारले प्रष्ट पारेको छ ।
उता माइक्रोसफ्ट कम्पनीले समेत बिहीबार आफ्नो सिस्टममा एक खतरनाक सफ्टवेयर फेला परेको जनाएको थियो ।
गत आइतबार मात्रै अमेरिकाको वाणिज्य मन्त्रालयमा समेत साइबर आक्रमण भएको थियो । वाणिज्य मन्त्रालयमा पछिल्लो एक महिनादेखि साइबर आक्रमण चलिरहेको भएता पनि आइतबार मात्रै त्यो पत्ता लागेको अधिकारीहरुले जनाएका छन् ।
अमेरिकाले आफ्ना सरकारी निकायहरुमा हुने साइबर आक्रमणमा रसिया जिम्मेवार रहेको आरोप लगाउने गरेको छ । तर रुसले त्यस्तो आरोप अस्वीकार गर्दै आएको छ ।
पछिल्लो साइबर आक्रमणका विषयमा राष्ट्रपति डोनाल्ड ट्रम्पको कुनै प्रतिक्रिया सार्वजनिक भएको छैन ।
तथापि नवनिर्वाचित राष्ट्रपति जो बाइडेनले चाहिँ साइबर सुरक्षाको विषय आफ्नो सरकारको सबैभन्दा ठूलो प्राथमिकताको विषय हुने बताइसकेका छन् ।
