काठमाडौँ । फागुन २१ गते सम्पन्न प्रतिनिधिसभा सदस्य निर्वाचनमा राष्ट्रिय स्वतन्त्र पार्टीले करिब दुई तिहाइ बहुमत ल्याउँदा स्थिर सरकार पाउने भन्दै निजी क्षेत्र खुसी देखिएको थियो ।
रास्वपाले करिब दुई तिहाइ बहुमत पाएसँगै गत चैत १३ गते बालेन्द्र शाह (बालेन) को नेतृत्वमा नयाँ सरकार बन्यो । सरकार बनेसँगै सरकारले सार्वजनिक गरेको राष्ट्रिय प्रतिबद्धतापत्र र शासकीय सुधारका १०० दिने कार्यसूचीले व्यवसायी थप उत्साहित भए, खुसी हुँदै सरकारको खुलेर प्रसंसा गरे ।
बालेन सरकारले शासकीय सुधारका लागि भन्दै सार्वजनिक गरेको राष्ट्रिय प्रतिबद्धतामा निजी क्षेत्रलाई अझ बढी प्राथमिकता दिएर ‘ड्राइभिङ सिट’मा नै राखेको छ, उनीहरूलाई उत्साहित बनाएको छ । रोजगारी सिर्जना, वस्तु तथा सेवा आपूर्ति, राजस्व योगदान र लगानीयोग्य पुँजी प्रवाहमा सरकार नियामक तथा सहजकर्ताको भूमिकामा मात्र रहने घोषणाले खासगरी ठुला उद्योगी–व्यवसायी खुसी छन् । उदार अर्थनीति अपनाउने सरकारको प्रतिबद्धताको खुलेर सर्मथन गरेका छन् ।
