जीवन बीमा कम्पनीहरुले चालु आवको पाँच महिनामा ७६ अर्ब ९० करोड ५७ लाख रुपैयाँ बीमा शुल्क संकलन गरेका छन् । १४ वटा जीवन बीमा कम्पनीमा कुल बीमा शुल्क संकलनको ठूलो हिस्सा भने नेपाल लाइफ इन्स्योरेन्सकै रहेको छ । नेपाल लाइफले कुल बीमा शुल्क संकलनको एक चौथाई भन्दा बढी हिस्सा ओगटेको छ ।
७६ अर्ब ९० करोड रुपैयाँ कुल बीमा शुल्क संकलन हुँदा सबैभन्दा बढी नेपाल लाइफ एक्लैले २१ अर्ब ३७ करोड रुपैयाँ बीमा शुल्क संकलन गरेको हो । यो कुल बीमा शुल्कको २७.७९ प्रतिशत हो। नेपाल लाइफपछि दोस्रो धेरै बीमा शुल्क संकलन गर्नेमा भने नेशनल लाइफ इन्स्योरेन्स रहेको छ । नेसनलले ५ महिनामा ९ अर्ब २७ करोड २ लाख रुपैयाँ शुल्क संकलन गरेकाे छ । जुन कुल बीमा शुल्कको १२.०५ प्रतिशत हो । तेस्रोमा भने लाइफ इन्स्योरेन्स कर्पोरेसन नेपाल (एलआईसी) रहेको छ। एलआईसीले नेपालले कुल बीमा शुल्क संकलनको १०.६४ प्रतिशत हिस्सा ओगेटेको छ । कुल बीमा शुल्क संकलनमा हिमालयन लाइफले ९ प्रतिशत, राष्ट्रिय जीवन बीमा कम्पनीले ७.२५ प्रतिशत, सूर्यज्योति इन्स्योरेन्सले ५.८२ प्रतिशत हिस्सा ओगेटेको छ ।
