नेपाल वायुसेवा निगमका कार्यकारी अध्यक्ष युवराज अधिकारीमाथि २३ बुँदामा गम्भीर आरोपसहितको उजुरी अख्तियार दुरुपयोग अनुसन्धान आयोगमा दर्ता भएको छ। उजुरीमा अधिकारीमाथि आफ्नै कर्मचारीमाथि यौन उत्पीडनदेखि अरबौं रुपैयाँ आर्थिक अनियमितता र पद दुरुपयोगसम्मका आरोप लगाइएका छन्।
अख्तियार स्रोतका अनुसार, अधिकारीले सत्ता र पहुँचमा रहेका व्यक्तिका नाता–सम्बन्धीलाई नियम विपरीत नियुक्ति गरी निगमलाई मासिक पचासौं लाख रुपैयाँ नोक्सानी पुर्याएको उल्लेख छ। नेपाल–अष्ट्रेलिया उडान सुरु नहुँदै निकट कर्मचारीलाई काजमा पठाई अनावश्यक खर्च बढाएको, कमिसनका लागि जहाजको इन्जिन विदेशमा थन्क्याएर भाडाको इन्जिन प्रयोग गरेको, र विदेशी कार्यालयमा कर्मचारी पठाउँदा कमिसन लिएर मात्र पठाउने गरेको विवरण उजुरीमा उल्लेख गरिएको छ।
