काठमाडौं - नेपाल राष्ट्र बैंकको १८औं गभर्नरका रूपमा प्रा.डा. विश्वनाथ पौडेल नियुक्त भएका छन्। २०८१ जेठ ६ गते साँझ बसेको मन्त्रिपरिषद् बैठकले अर्थमन्त्री विष्णु पौडेलको संयोजकत्वमा गठित सिफारिस समितिबाट पेश भएको नामावलीका आधारमा पौडेललाई गभर्नरमा नियुक्त गर्ने निर्णय गरेको हो।
गभर्नर पदका लागि सिफारिस समितिले तीन जना उम्मेदवार प्रा.डा. विश्वनाथ पौडेल, कार्यबाहक गभर्नर निलम ढुंगाना तिवारी, र पूर्वसचिव दिनेश भट्टराईको नाम क्रमसः पहिलो, दोस्रो र तेस्रो स्थानमा सिफारिस गरेको थियो। राष्ट्र बैंक ऐन, २०१२ अनुसार गभर्नरको नियुक्ति मन्त्रिपरिषदबाट गरिने व्यवस्था छ।
प्रा.डा. विश्वनाथ पौडेल एक उच्च शिक्षित अर्थशास्त्री हुन्। उनले अमेरिकास्थित युनिभर्सिटी अफ क्यालिफोर्निया, बर्कलेबाट अर्थशास्त्रमा विद्यावारिधि (PhD) गरेका छन्। अमेरिकामै स्नातकोत्तर अध्ययनपछि उनले चीनको शाङ्हाईस्थित विश्वविद्यालयबाट इन्जिनियरिङमा स्नातक उपाधि प्राप्त गरेका थिए।
पौडेल २०७८ साउन १२ गते प्रधानमन्त्री शेरबहादुर देउवाको कार्यकालमा राष्ट्रिय योजना आयोगको उपाध्यक्षमा नियुक्त भएका थिए। यसअघि उनले सानिमा बैंकको सञ्चालक समिति सदस्यका रूपमा कार्य गरेका थिए। साथै, विश्व बैंक, अन्तर्राष्ट्रिय श्रम संगठन (ILO) र मिलेनियम च्यालेन्ज कर्पोरेशन (MCC) मा उनले अर्थशास्त्रीका रूपमा सेवा दिएका छन्।
शैक्षिक र नीतिगत पृष्ठभूमिसँगै, उनी सन् २०१९ देखि २०२१ सम्म ललितपुरस्थित युलेन्स स्कूलको बोर्ड अफ ट्रस्टी सदस्यका रूपमा पनि आवद्ध थिए। उनी आर्थिक नीति विश्लेषण, इतिहास र अनुसन्धनमा क्रियाशील रहँदै आएका छन्। उनका लेख र विचार विश्लेषणहरू राष्ट्रिय तथा अन्तर्राष्ट्रिय मिडिया तथा जर्नलहरूमा प्रकाशित हुँदै आएका छन्।
यस नियुक्तिपछि राष्ट्र बैंकको नेतृत्व पुनः पूर्णकालीन गभर्नरको जिम्मामा पुगेको छ। प्रा.डा. पौडेलको कार्यकाल पाँच वर्षका लागि हुनेछ।
