'कट अफ डेट' तोक्न बोर्डले लगानीकर्ताका नेताहरुलाई छलफलमा डाक्यो, बैठक दिउँसो साढे १ बजे हुने

काठमाण्डौ । नेपाल धितोपत्र बोर्डले भारित लागत औसत विधिबाट पूँजीगत लाभकर गणनाका लागि अन्यौलमा रहेको कट अफ डेट तोक्ने विषयमा छलफल गर्न आज दिउँसो साढे १ बजे लगानीकर्ता संघसंगठनका नेताहरुलाई बोलाएको छ । 
नेपाल धितोपत्र बोर्ड, नेपाल स्टक एक्सचेञ्ज (नेप्से) र सिडिएससी एण्ड क्लियरिङ लिमीटेडका अधिकारीबीच मंगलबार झण्डै ५ घण्टा चलेको छलफलले कट अफ डेट तोक्ने विषयमा आन्तरिक सहमति कायम भएको थियो । स्रोतका अनुसार २०७२ माघ २ गते वा ०७६ असार ३१ गतेको सेयरको अन्तिम मूल्यलाई कटअफ मानेर भारित औसत लागत गणना गर्न सकिने बताइएको छ । 
यही विषयमा सहमति जुटाउन पाँचवाट लगानीकर्ता संघसंगठनका नेताहरुलाई बोर्डले छलफलका लागि बोलाएको हो । छलफलमा नेपाल इन्भेस्टर्स फोरमका अध्यक्ष छोटेलाल रौनियार, सेयर लगानीकर्ता संघका अध्यक्ष उत्तम अर्याल, नेपाल पुँजीबजार लगानीकर्ता संघकीअध्यक्ष राधा पोखरेल, लगानीकर्ता दबाब समूहका अध्यक्ष हरि ढकाल र नेपाल पुँजी बजार संघकी अध्यक्ष संरक्षणा चौधरीलाई बोर्डले बोलाएको हो ।