काठमाडौँ — नेपालमा सक्रिय रूपमा सामाजिक सञ्जाल प्रयोग गर्नेको संख्या १ करोड ३५ लाख अर्थात् कुल जनसंख्याको ४३.५ प्रतिशत रहेको एक अध्ययनले देखाएको छ । डिजिटल गतिविधिबारे विश्वव्यापी तथ्यांक संकलन र विश्लेषण गर्दै आएको डेटा रिपोर्टलको सन् २०२४ को विवरणअनुसार नेपालका ८७.७ प्रतिशत मानिसले कम्तीमा एउटा, कुनै न कुनै सामाजिक सञ्जाल प्लाटफर्म चलाउने गरेका छन् ।
यसमध्ये इन्स्टाग्रामको पहुँच र लोकप्रियता पछिल्लो समय उल्लेख्य बढेको देखिन्छ । विगत एक वर्षमा इन्स्टामार्फत गरिएका विज्ञापनहरूको पहुँच ६७ प्रतिशतले बढेको प्रतिवेदनले औंल्याएको छ ।
