काठमाडौँ — नेपाल राष्ट्र बैंकका गभर्नर महाप्रसाद अधिकारीले प्रभावकारी वित्तीय साक्षरताबिना वित्तीय समावेशीकरणको लक्ष्य प्राप्त गर्न कठिन हुने बताएका छन् । ‘ग्लोबल मनी विक २०२४’ शुभारम्भ कार्यक्रममा सोमबार गभर्नर अधिकारीले वित्तीय समावेशीकरणको लक्ष्य प्राप्तिका लागि पनि वित्तीय साक्षरतालाई प्रभावकारी तुल्याउनुपर्ने बताएका हुन् ।
‘राज्यका सबै तहका व्यक्तिसम्म वित्तीय सेवा नपुग्दासम्म वित्तीय समावेशीकरणको लक्ष्यमा पुग्न सकिँदैन । वित्तीय साक्षरता त्यसको एउटा अभिन्न पक्ष हो,’ उनले भने, ‘ग्लोबल मनी विकको साताव्यापी अभियानलाई सफल तुल्याउनका लागि बालबालिका र युवालक्षित चेतनामूलक कार्यक्रम सञ्चालन गर्नुपर्छ ।’
