विश्वभरि नै पेन्सन अर्थात निवृत्तभरण कोषलाई व्यवस्थापन गर्ने काम निकै महत्वपूर्ण जिम्मेवारीका रुपमा लिइन्छ । अरु देशमा सरकारी र निजी गरि दुवै किसिमका पेन्सन फन्डहरु सञ्चालन हुने भए पनि नेपालमा भने सरकारी पेन्सन कोष मात्रै सञ्चालनमा रहेको छ ।
नेपालमा पहिले कौषी तोषाखाना भनिने निवृत्तभरण व्यवस्थापन कार्यालयले सेवा निवृत्त निजामती कर्मचारीहरु,सामुदायिक विद्यालयका शिक्षकहरु,नेपाली सेना र नेपाल प्रहरी, सशस्त्र प्रहरी बल तथा राष्ट्रिय अनुसन्धान विभागका कर्मचारीहरुको निवृत्तभरण विवरणको अभिलेख राख्ने तथा मासिक रुपमा निवृत्तभरण रकम भुक्तानी गर्ने काम गर्दछ । यस निवृत्तभरण कोषलाई कर्मचारी सञ्चयकोषमार्फत सञ्चालन गरिँदै आएको छ ।
