नेपाल राष्ट्र बैंकले आफ्नो प्रारम्भिक लेखापरीक्षण सकेको छ । अन्तर्राष्ट्रिय प्रतिस्पर्धाबाट छनोट भएको कम्पनीले राष्ट्र बैंकको लेखापरीक्षण गरेको र सोको प्रारम्भिक प्रतिवेदन प्राप्त भएको महालेखा परीक्षकको कार्यालयले जानकारी दियो ।
अन्तर्राष्ट्रिय मुद्रा कोष (आईएमएफ) ले राखेको सर्त अनुसार नेपाल राष्ट्र बैंकको लेखापरीक्षण (अडिट) भएको हो । आईएमएफले अन्तर्राष्ट्रिय अडिट कम्पनीबाट राष्ट्र बैंकको अडिट गराउनु पर्ने सर्त राखेको थियो । आईएमएफले नेपाललाई एक्स्टेण्डेड क्रेडिट फेसिलिटी (ईसीएफ) अन्तर्गत दिन लागेको दोस्रो किस्ता रोकेर पहिला राष्ट्र बैंकको अडिट अन्तराष्ट्रिय अडिट कम्पनीबाट गराउन भनेको थियो ।
