रूपन्देहीको मर्चवारमा सञ्चालन गरिएको माछापुच्छ्रे बैंकको शाखारहित सेवा केन्द्रमार्फत सर्वसाधारणको ठूलो रकम हिनामिना गरिएपछि नेपाल राष्ट्र बैंकले छानबिन प्रक्रिया अगाडि बढाएको छ। राष्ट्र बैंकको भुक्तानी प्रणाली विभागका उपनिर्देशक दिपक अधिकारी, राष्ट्र बैंक भैरहवाका उपनिर्देशक जीवनप्रकाश पाण्डे र सहनिर्देशक विवेक बुढाथोकी सम्मिलित टोली सोमबार मर्चवार पुगेको छ। टोलीले सेवा केन्द्रको अवस्था र सो सेवा केन्द्र मार्फत गरिएको रकम हिनामिनाका सम्बन्धमा केन्द्रका एजेन्ट, व्यवस्थापक र स्थानीयसँग सोधपुछ गर्न थालेको छ।
रकम हिनामिना भएको घटना बाहिरिएपछि माछापुच्छ्रे बैंकले सेवा केन्द्र बन्द गर्न निवेदन दिएकाले आवश्यक छानबिन प्रक्रिया अगाडि बढाइएको स्थलगत अध्ययनमा आएका राष्ट्र बैंकका उपनिर्देशक दिपक अधिकारीले बताए।
