राष्ट्रिय सहकारी बैंकका प्रमुख कार्यकारी अधिकृत बद्रीप्रसाद गुरागाईले राष्ट्रिय सहकारी बैंक बलियो बन्दै गएको बताए। २० औं स्थापना दिवसको अवसरमा बोल्दै गुरागाईले केहि वाणिज्य बैंकहरुको भन्दा यस बैंकको पुँजी कोष बलियो भएको बताएका हुन् ।
सहकारी बैंकले संयमित भएर कर्जा लगानी गरेको छ। सदस्यहरुको सहजता, उत्पादन क्षेत्रको विकाससँगै उत्कृष्ट वित्तीय सेवा प्रदान गरेको गुरागाईको दावी छ।
हालसम्म बैंकमा करिब १५ हजार सदस्य रहेका छन्। आगामी दिनमा सदस्य संख्या र सदस्यहरुको क्षमता अभिवृद्धसँगै वित्तीय सेवामा मजबुद बनाउदै लैजाने उनले प्रतिवद्धता जनाए। बैंकले आफ्ना शेयर सदस्यहरुलाइ लाभांश वितरण गर्दै आएको छ। बैंकले १५ प्रतिशतसम्म लाभांश वितरण गर्न सक्ने क्षमतामा रहेको जानकारी गराए।
बैंकले इ–लाइब्रेरी स्थापना गरेको छ । लाइब्रेरीमा सहकारीका ऐन, कानुन, निर्देशन तथा परिपत्रका साथै नमुना नीति तथा कार्यविधिहरु, तालिमका भिडियोहरु, लेख रचनालगायतका शिक्षा तथा सूचनामूलक सामग्रीहरु हुने छ। सहकारी सम्बन्धी कुनै पनि विषयमा अध्ययन अनुसन्धान गर्न तथा संस्थाहरुको कामलाई समेत सहज हुने गुरागाईको दाबी छ ।
