नेपाल राष्ट्र बैंकले कोभिड–१९ ले अर्थतन्त्रमा पारेको प्रभावलाई सम्बोधन गरी उद्योग, पेशा, व्यवसायको पुनरुत्थानमा सहयोग पुर्याउन पुनरकर्जामा पहुँच अभिवृद्धि गरी विद्यमान पुनरकर्जा सुविधालाई थप व्यवस्थित र प्रभावकारी बनाउने उद्देश्यले नेपाल राष्ट्र बैंक ऐन, २०५८ को दफा ११० को उपदफा (३) ले दिएको अधिकार प्रयोग गरी यो कार्यविधि बनाइएको छ ।
केन्द्रीय बैंकले पुनर्कर्जा कार्यविधि, २०७७ मा तेस्रो संशोधनसहित लागू गरेको छ । नेपाल राष्ट्र बैंकले विद्युतीय भुक्तानी प्रणालीको समग्र इकोसिस्टमको विकास र प्रवद्र्धनमा लगानी गर्ने भुक्तानी सेवा प्रदायक तथा भुक्तानी प्रणाली सञ्चालक र सञ्चार सेवा प्रदायक संस्थाहरुलाई पनि विशेष पुनर्कर्जा प्रदान गर्नेगरी कार्यविधि संशोधन गरेको छ । ब्रोडब्याण्ड प्रवद्र्धन गरी दुर्गम स्थानहरुमा सेवा पुर्याउने इन्टरनेट सेवा प्रदायक संस्थाहरुलाई विशेष पुनर्कर्जा दिने भएको छ । विशेष पुनर्कर्जा सुविधा अन्तर्गत यस्ता संस्थाहरुले ३ प्रतिशत ब्याजदरमै ऋण पाउने केन्द्रीय बैंकले जनाएको छ ।
