शेयर कारोबार रोक्का गरिएका कम्पनीहरुको कारोबार कहिले खुल्छ भन्ने बारे आम लगानीकर्ताको चासो बढेको छ । नेपाल धितोपत्र बोर्डको निर्देशनमा नेप्सेले १३ कम्पनीको शेयर कारोबार रोक्का राखेको छ । शेयर कारोबार रोक्का हुँदा लगानीकर्ताहरुले खरिद बिक्रि गर्न पाएका छैनन् ।
यी कम्पनीले नेप्सेले धितोपत्र दर्ता तथा निष्काशन नियमावली २०७३ को नियम २६ को उपनियम २ बमोजिम धितोपत्र बोर्डमा पेश गर्नुपर्ने बार्षिक प्रतिवेदन तथा वित्तीय विवरण तथा सूचीकरण विनीयामावली ७५ को विनियम अनुसार नेप्सेमा पेश गर्नुपर्ने विवरणहरु पेश नगरेकाले कारोबार रोक्का गरिएको हो ।
नेपाल धितोपत्र बोर्डका अनुसार अब यी कम्पनीले आर्थिक वर्ष ७५/७६ लेखापरीक्षण गरिएको विवरणहरु बोर्ड, नेप्सेमा बुझाएर आफ्नो वेबसाइटमा लगानीकर्ताको जानकारीको लागि राखेपछि मात्र कारोबार खुला गरिने छ । विवरण प्रकाशित नगर्ने कम्पनीहरुलाई नेप्सेले नै कारवाही गर्नु पर्ने भए पनि नेप्सेले अपेक्षा अनुसार काम नगरेकोले नेप्सेलाई झक्झकाउनको लागि कारोबार रोक्न निर्देशन दिईएको बोर्डले जनाएको छ । यी काम गर्ने जिम्मेवारी नेप्से कै भएकोले अब बाँकि काम नेप्सेले नै गर्ने बोर्डले जनाएको छ ।
