सिंहदरबारमा १२ वर्ष रजाइ गरेको एभरेस्ट बैंक किन निकालियो ?


Aarthik News 2076-5-27


Aarthik News

काठमाडौं । गोप्य सूचना भारत पठाउँदै आएको भन्ने आरोप खेप्दै आएको एभरेस्ट बैंकको सिंहदरबार शाखालाई त्यहाँबाट बाहिर ल्याउने तयारी गरिएको छ । गोप्य सूचना विदेश जाने डरले भीभीआईपी र भीआईपीले सरकारी स्वामित्वको राष्ट्रिय वाणिज्य बैंकमार्फत कारोबार गर्न थालेपछि एभरेष्ट बैंकले त्यहाँको शाखा स्थानान्तण गर्न बाध्य हुन पुगेको हो । 

एभरेस्ट बैंक काम विहीन बनाइएपछि सिहंदरबारभित्रको शाखालाई सिंहदरबार बाहिर सार्न लागिएको एभरेस्ट बैंकका उच्च अधिकारीले बताए । एभरेस्ट बैंकले सिंहदरबारभित्र करिब १२ वर्ष एकलौटी रजाइ गर्दै आएको थियो । एभरेस्ट बैंकको रजाईलाई तोड्दै राष्ट्रिय वाणिज्य बैंकको शाखा सिंहदरबारभित्र लगिएपछि उसको सेखी गिरेको थियो ।

गत वर्ष बेहुलीजस्तै अन्माइएर राष्ट्रिय वाणिज्य बैंकलाई सिहदरबारभित्र छिराइएको थियो । भीभीआईपी र भीआईपीको गोप्य सूचना मुलुक बाहिर गएको भन्दै संसदभित्र र बाहिरसमेत चर्को विरोध भएपछि एभरेस्ट बैंकको सिंहदरबार भित्रको शाखा निष्कृय पार्ने गरी राष्ट्रिय वाणिज्य बैंकलाई सिंहदरबारभित्र शाखा खोल्न अनुमति दिइएको थियो । 

एभरेस्ट बैंकको प्रतिस्पर्धीको रुपमा राष्ट्रिय वाणिज्य बैंकलाई सिंहदरबार भित्र्याइएको थियो । १२ वर्षदेखि एभरेष्ट बैंकले गर्दै आएको काम राष्ट्रिय वाणिज्य बैंकलाई दिइएको र एभरेष्ट बैंकलाई काम विहीन हुने अवस्था पुर्याइएको छ । योजनाबद्ध रुपमा नै एभरेष्ट बैंकलाई शाखा सार्न बाध्यात्मक पारिएपछि त्यहाँबाट शाखा सार्ने तयारी उक्त बैंकले गरेको हो ।

Read More
  • Financial Notices