नक्कली ऋणी बनाएर १८ करोड हिनामिना


Nagarik News 2076-5-17


Nagarik News

दाङ – देवः विकास बैंक नारायणपुर शाखाका म्यानेजर समिर बुढाथोकीले नक्कली ऋणी बनाएर १८ करोड रकम हिनामिना गरेको प्रहरी अनुसन्धानले देखाएको छ।

प्रहरीले केही दिनअघि बुढाथोकीसहित १२ जनालाई पक्राउ गरेपछि घटनाको अनुसन्धान गरेको थियो। जिल्ला प्रहरी कार्यालय दाङका प्रहरी निरीक्षक राजन गौतमका अनुसार प्रारम्भिक अनुसन्धानले बैंकको १७ करोड ९९ लाख ९० हजार रुपैयाँ हिनामिना गरेको तथ्य फेला परेको हो। यसमा ५० जनाभन्दा बढी व्यक्तिको संलग्नता रहेको आशंका गरिएको छ।

यो प्रकरणमा प्रहरीले घोराही–१०, नारायणपुरका बसन्तबहादुर बस्नेत, अर्जुन बस्नेत, झगबहादुर बस्नेत, उज्ज्वल आचार्य, मतकुमार पौडेल, बसन्त बुढाथोकी, कोइलावास स्थायी घर भई हाल घोराहीमा बस्दै आएकी बन्धना गुप्ता, विरेन्द्रकुमार गुप्ता, सक्टुराम गुप्ता, घोराहस–१४ का विजयकुमार गुप्ता र घोराही–१०, नारायणपुरका टोपेन्द्रकुमार पोख्रेललाई नियन्त्रणमा लिएको थियो। उनीहरु सबैलाई प्रहरीले थप अनुसन्धानका लागि उच्च अदालत तुलसीपुरबाट १० दिनको म्याद थप गरेको छ। अनुसन्धान अहिले पनि जारी छ।

प्रहरीका अनुसार बैंकको १८ करोड रकम हिनामिना गर्ने गिरोहका मुख्य योजनाकार म्यानेजर बुढाथोकी हुन्। बुढाथोकीले नक्कली ऋणी खडा गरेर बैंकको रकम अन्य व्यक्तिको खातामा हालिदिने गरेको देखिएको छ। उनका अनुसार नक्कली ऋणी खडा गर्ने र ऋणका लागि भन्दै अन्यका खातामा रकम पठाउने गरिएको छ।

Read More
  • Financial Notices