काठमाडौँ । तामाकोशी जलविद्युत् कम्पनी लिमिटेडले निर्माण गर्न लागेको तामाकोशी–५ जलविद्युत् आयोजनाको लागत उल्लेखनीय रूपमा बढेको छ । जसका कारण परियोजनामा वित्तीय जोखिम कायमै रहेको क्रेडिट रेटिङ एजेन्सी इक्रा नेपालको प्रतिवेदनले जनाएको छ ।
नेपाल विद्युत् प्राधिकरणको सहायक कम्पनी रहेको यो कम्पनीले ९९ दशमलव ८ मेगावाट क्षमताको यो परियोजना निर्माण गर्दै छ । शुरूमा प्रति मेगावाट २१ करोड २० लाख रुपैयाँ लागत अनुमान गरिएको आयोजनाको लागत करीब १६ प्रतिशतले वृद्धि भई प्रति मेगावाट २४ करोड ६० लाख रुपैयाँ पुगेको प्रतिवेदनमा उल्लेख गरिएको छ । कम्पनीले ६५:३५ ऋण–इक्विटी संरचनामा परियोजनामा लगानी गर्न लागेको हो ।
